KAMA UNA NDOTO YA KUSUBIRI ‘GEMU’ LA YANGA KWENYE KIDEO, IMEKULA KWAKO!!!

Murro akisisitiza jambo kwa waandishi wa habari, hawapo pichani.

Kwa wale wapenda vya dezo, sasa imekula kwao baada ya uongozi wa Yanga kutangaza kuwa hautaruhusu mchezo wao wa kimataifa, dhidi ya DBF XI ya Botswana kurushwa na kituo chochote,  lakini ukafafanua kuwa iwapo kampuni yoyote itajitokeza kuchangamkia tenda hiyo kabla ya mchezo, basi wakazi wa Dar  watafaidi, vinginevyo wakaisikilizia kwenye bomba.

Jerry Murro ambaye ni mkuu wa kitengo cha habari, amesema kuwa wamefikia uamuzi ya kupiga stop kuoneshwa kwa mchezo huo kwa kutaka wakazi wa Dar kujitokeza kwa wingi siku hiyo, ikiwa ni moja ya kuipiga sapoti timu yao. Viingilio vya mchezo huo vitakuwa ni

kuanzia buku tano (5,000) hadi 30,000 kwa kiingilio cha juu na tiketi zitaanza kuuzwa siku moja kabla ya mchezo.

Alikwenda mbali na kusema kuwa wapo tayari kuwasaidia wakazi wa mikoani ambao si rahisi kuja uwanjani, lakini si kwa wakazi wa jiji kufaidi uhondo wa bure.

Mashabiki wa namna hii ndio wanatakiwa Jumamosi, sio wale wakuvizia kideoni.

“Wakazi wa Jiji la Dar mtatusamehe, tumepanga kutorusha mchezo wetu moja kwa moja, na ni bora tukaruhusu ‘signal’ kurushwa mikoani ambao tuna uhakika kuwa hawawezi kufika uwanjani. Tumeamua kuweka kiasi cha chini ambacho tunaamini mtu yeyote anaweza kumudu akiamua, ndiyo maana tunataka watu wajitokeze kwa wingi ili waisaidie timu kwa namna moja ama nyingine.

“Lakini iwapo kampuni itajitokeza kununua haki ya matangazo, sisi tunawakaribisha ili tufanye biashara lakini iwe ni hela ambayo tunaamini itaisaidia timu,” alisema Murro.